საქართველოს მოსახლეობის, სულ მცირე, 70% ქვეყნის ევროატლანტიკური ინტეგრაციის მომხრეა, ხოლო ქართულ პოლიტიკურ სპექტრში დომინირებენ ის ძალები, რომლებიც ევროკავშირსა და ნატოში გაწევრიანებას საქართველოს უალტერნატივო არჩევნად მიიჩნევენ, თუმცა, ამ ფონზე, ზოგიერთი ქართველი ექსპერტი და მკვლევარი კვლავ შიშობს, რომ რუსეთს, მის ხელთ არსებული ეკონომიკური, პოლიტიკური და საინფორმაციო ბერკეტებით, შეუძლია ზეგავლენა მოახდინოს და სხვა მიმართულებით წაიყვანოს საქართველოში მიმდინარე პოლიტიკური პროცესები. მსგავს გაფრთხილებას შეიცავს „ევროპული ინიციატივა - ლიბერალური აკადემია თბილისის“ მიერ მომზადებული ანგარიში,რომელიც საქართველოში რუსეთის „ხისტი“ და „რბილი ძალის“ სახიფათო კომბინაციაზე ამახვილებს ყურადღებას. კობა ლიკლიკაძე ამ ორგანიზაციის ხელმძღვანელს, ლაშა ტუღუშს, გაესაუბრა.
