„დიდხანს ველოდით, ვემზადებოდით, ბოლოს და ბოლოს შევძელით ამის გაკეთება“, - ასე თქვა უკრაინის სამხედრო დაზვერვის (GUR) ხელმძღვანელმა კირილო ბუდანოვმა იმის შესახებ, თუ როგორ ჩამოაგდეს უკრაინის ძალებმა რუსეთის სტრატეგიული ბომბდამშენი Ту-22МЗ, რომელიც 19 აპრილს უკრაინის წინააღმდეგ მორიგ იერიშში მონაწილეობდა.
უკრაინის სამხედროები ერთი კვირის განმავლობაში ელოდნენ სამიზნის გამოჩენას საჭირო ადგილას, თქვა GUR-ის ხელმძღვანელმა. ბუდანოვს დეტალებზე არ უსაუბრია, მაგრამ აღნიშნა, რომ თვითმფრინავი 308 კილომეტრის დაშორებაზე ჩამოაგდეს. მის გასანადგურებლად გამოყენებულ იქნა მეთოდები და საშუალებები, რომლებიც ადრე გამოიყენეს თვითმფრინავ A-50-ის ჰაერში გასანადგურებლად.
GUR-ის თანახმად, რუსეთს კიდევ ჰყავს ამ ტიპის თვითმფრინავები. მაგრამ მან აღნიშნა, რომ „ამ ომში ეს მოწინააღმდეგის შორეული ავიაციის თვითმფრინავის განადგურების პირველი შემთხვევაა“, რის გამოც „ოდესის საქმე ცოტა უფრო იოლად იქნება“.
GUR-ის ხელმძღვანელმა განმარტა, რომ თვითმფრინავები Ту-22МЗ-ები იყენებდნენ Х-22 რაკეტებს, „რომლებმაც ქალაქს ალბათ ყველაზე დიდი ნგრევა მოუტანა“. მისი სიტყვებით, ამ მძლავრი და სწრაფი რაკეტების „დაჭერას ვერავინ ახერხებდა“. მაგრამ, ვინაიდან ის ჯერ კიდევ საბჭოთა პერიოდშია შექმნილი, ძალზე დიდი სიზუსტით არ ხასიათდებოდა“.
ახლა რუსეთი იძულებული გახდება, ახალი გამშვები საზღვრები გამოძებნოს რაკეტების გასაშვებად და ისინი იძულებული იქნებიან, გამოიყენონ „მხოლოდ სახმელეთო კომპლექსები და შორეული ავიაციიდან და ზღვიდან გაშვებული რაკეტები ოდესის წინააღმდეგ იერიშებისას“, ამბობს ბუდანოვი.
ადრე უკრაინის სამხედროებმა განაცხადეს, რომ 19 აპრილს მათ პირველად მოახერხეს რუსეთის სტრატეგიული ბომბდამშენის, Ту-22МЗ-ის ჩამოგდება. ის ატარებს ფრთოსან რაკეტებს Х-22-ს, რომლებითაც პარასკევს მორიგი მასირებული იერიშისას დარტყმები მიაყენა უკრაინის ქალაქებს.
თვითმფრინავის ჩამოგდება იყო უკრაინის სამხედრო დაზვერვისა და სამხედრო-საჰაერო ძალების ერთობლივი ოპერაცია, იტყობინება GUR-ის ხელმძღვანელი. გამოქვეყნდა ვიდეო, რომელშიც სავარაუდოდ თვითმფრინავის ჩამოგდების მომენტია ასახული.
მანამდე რუსეთის თავდაცვის სამინისტრო იუწყებოდა, რომ სტავროპოლის მხარეში, დაუსახლებელ რაიონში, ჩამოვარდა Ту-22МЗ ტიპის ბომბდამშენი, რომელიც „საბრძოლო დავალების“ შესრულების შემდეგ ბაზირების აეროდრომზე ბრუნდებოდა, მფრინავებმა კატაპულტირება მოასწრეს, ეკიპაჟის სამი წევრი ევაკუირებული იყო, ერთის ძებნა კი გრძელდებოდა.
„რია ნოვოსტი“ ადგილობრივი გუბერნატორის ინფორმაციაზე დაყრდნობით იტყობინება, რომ ერთი პილოტი დაიღუპა.
რუსეთის თავდაცვის სამინისტრომ ავარიის წინასწარ მიზეზად ტექნიკური გაუმართაობა დაასახელა.
დამოუკიდებელი წყაროების მონაცემები, რომლებიც დაადასტურებდა კირილო ბუდანოვის მონათხრობს, ჯერჯერობით არ მოიპოვება.