„აგენტების კანონის“ პირველი მოსმენით მიღების შემდეგ პარლამენტის უფრაქციო წევრმა გრიგოლ ვაშაძემ განაცხადა, რომ უმაღლესი წარმომადგენლობითი ორგანოს რიგებს ტოვებს. მან განცხადებაში გადაწყვეტილების მიზეზად „უცხოური გავლენის გამჭვირვალობის შესახებ“ კანონი დაასახელა.
„კანონპროექტის, რომელსაც დასახასიათებლად რა გეოგრაფიული დეფინიციაც არ უნდა მოუნახო რუსეთიდან ზიმბაბვემდე, არსებობას და მით უმეტეს მიღებას, არც სამართლებრივი, არც პოლიტიკური, არც მორალური და არც პრაგმატული გამართლება აქვს. ეს კანონპროექტი თუ კანონად გადაიქცევა, საბოლოოდ ავტორიტარული რეჟიმის დასამყარებლად იქნება გამოყენებული. დღეს რომ შეწყდეს ამ კანონპროექტის განხილვა, უდიდესი ზიანი ჩვენს ევროპულ პერსპექტივას უკვე მიადგა“, - აღნიშნულია ვაშაძის განცხადებაში.
ვაშაძე მიიჩნევს, რომ საქართველოს პარლამენტის წევრობას მისთვის აზრი არ აქვს.
„ამ პირობებში პარლამენტში ყოფნას ჩემთვის არც პოლიტიკური აზრი და არც მორალური გამართლება გააჩნია. ვტოვებ პარლამენტს! ქართული საზოგადოების აზრს ჩემთვის გადამწყვეტი მნიშვნელობა აქვს. ვიტოვებ იმედს, რომ ხელისუფლება უარს იტყვის ამ კანონპროექტის მიღებაზე“, - ვკითხულობთ ვაშაძის განცხადებაში.
გრიგოლ ვაშაძემ "ნაციონალური მოძრაობის" თავმჯდომარის თანამდებობა 2020 წლის 15 დეკემბერს დატოვა. მაშინ ის პარტიის დატოვების ერთ-ერთ მიზეზად იმას ასახელებდა, რომ გადაწყვეტილებები "პარტიის ხელმძღვანელობის უმრავლესობის მიერ პარტიის წევრებთან კონსულტაციების გარეშე" მიიღებოდა. ვაშაძე პარტიის თავმჯდომარის თანამდებობას 2017 წლიდან იკავებდა.
ე.წ. აგენტების კანონი პარლამენტმა პლენარულ სხდომაზე 17 აპრილს პირველი მოსმენით მიიღო.
„აგენტების კანონს“ რამდენიმე დღეა, მოქალაქეები პარლამენტის შენობასთან აპროტესტებენ.
საქართველოს პარტნიორი ქვეყნებისა და ორგანიზაციების შეფასებით, ე.წ. აგენტების კანონი ხელს შეუშლის ქვეყნის ევროინტეგრაციას, მმართველი პარტია კი ამტკიცებს, რომ ის ევროპულია.
2023 წლის მარტში ხალხმრავალი აქციებისა და საერთაშორისო კრიტიკის გამო საპარლამენტო უმრავლესობა იძულებული გახდა, „უცხოეთის აგენტების კანონი“ ჩაეგდო და პირობა დადო, რომ პროექტს აღარ დაუბრუნდებოდა.
„ქართულმა ოცნებამ“ კანონპროექტი 2024 წლის 3 აპრილს დააბრუნა პარლამენტში. ტერმინი „უცხოური გავლენის აგენტი“ პროექტში მან "უცხო ძალის ინტერესების გამტარებელი ორგანიზაციით" ჩაანაცვლა.
