30 მარტს, თვითმხილველების თანახმად, ღაზა მძიმე შეტაკებებმა და აფეთქებებმა შეარყია. როგორც "წითელი ნახევარმთვარე" იტყობინება, რამდენიმე ადამიანი დაიღუპა დახმარების ქაოსური განაწილების დროს ტერიტორიის ჩრდილოეთ ნაწილში, რომელსაც შიმშილი ემუქრება. ისრაელის პრემიერ-მინისტრმა, ბენიამინ ნეთანიაჰუმ მხარი დაუჭირა მოლაპარაკებების ახალ რაუნდს ღაზაში ზავის შესახებ ისრაელსა და აშშ-ში და ევროკავშირში ტერორისტულ ორგანიზაციად შერაცხილ ჰამასს შორის მას შემდეგ, რაც გაეროს უშიშროების საბჭოს სავალდებულო რეზოლუციამ გასულ ორშაბათს "ცეცხლის დაუყოვნებლივ შეწყვეტა" მოითხოვა. საერთაშორისო სასამართლომ დაავალდებულა ისრაელი, უზრუნველყოს დახმარების მიწოდება სასოწარკვეთილი მშვიდობიანი მოსახლეობისთვის.
საბრძოლო მოქმედებები არ შენელებულა არც ამ რეგიონის უდიდესი საავადმყოფოს გარშემო. ღაზის სექტორის - რომელსაც ჰამასი მართავს - ჯანდაცვის სამინისტროს ბოლო მონაცემების თანახმად, სულ ცოტა, კიდევ 82 ადამიანი დაიღუპა გასული 24 საათის განმავლობაში. ჰამასის პრესსამსახური იტყობინება ისრაელის 50-ზე მეტი საჰაერო თავდასხმის შესახებ გასული დღის განმავლობაში, რომლის დროსაც სამიზნეები იყო „საცხოვრებელი სახლები“ სანაპიროს გასწვრივ.
ისრაელის სამხედროებმა 30 მარტს განაცხადეს, რომ დაარტყეს ათობით სამიზნეს, მოწინააღმდეგის მებრძოლებსა და მათ შენაერთებს ღაზის ცენტრალურ და ჩრდილოეთ ნაწილებში.
ნეთანიაჰუს ოფისმა განაცხადა, რომ ახალი მოლაპარაკებები ღაზაში ცეცხლის შეწყვეტისა და მძევლების გათავისუფლების შესახებ, გაიმართება დოჰასა და კაიროში "უახლოეს დღეებში“.
მოლაპარაკებები ჩიხში აღმოჩნდა აშშ-ის, რომელიც მილიარდობით დოლარის სამხედრო დახმარებას უწევს ისრაელს და მისი თანაშუამავლების, ეგვიპტისა და კატარის მხრიდან სერიოზული ძალისხმევის მიუხედავად - უზრუნველეყოთ ზავი რამადანის - მუსლიმთა წმინდა, მარხვის თვეში, რომლის ნახევარი ახლა უკვე გასულია.
ჰააგის მართლმსაჯულების საერთაშორისო სასამართლომ (ICJ) განაცხადა, რომ მიიღო სამხრეთ აფრიკის არგუმენტი იმის შესახებ, რომ ღაზაში ჰუმანიტარული ვითარების შემდგომი გაუარესება ისრაელისგან მეტის გაკეთებას მოითხოვს მაშინ, როცა შიმშილი "იწყება". "წითელი ნახევარმთვარის" განცხადებით, ღაზის ჩრდილოეთში დახმარების მიწოდებისას, ხუთი ადამიანი დაიღუპა და ათობით ადამიანი დაშავდა სროლისა და ჭყლეტის შედეგად.
ეს ბოლო მსგავსი ინციდენტია ღაზის ჩრდილოეთში, სადაც გაეროს მხარდაჭერით მომზადებული ანგარიშის თანახმად, მაისში მოსალოდნელია შიმშილი, თუ არ მოხდება სასწრაფო ჩარევა.
ღაზის სექტორის ჯანდაცვის უწყების თანახმად, 7 ოქტომბერს ისრაელის მიერ პალესტინელთა ტერიტორიაზე დაწყებული სამხედრო ოპერაციის შედეგად დაღუპულთა რიცხვმა 32 705-ს მიაღწია.
ისრაელმა ღაზის სექტორში, პალესტინელთა ტერიტორიაზე სამხედრო მოქმედებები დაიწყო ჰამასის მეომრების ისრაელზე თავდასხმის საპასუხოდ.
7 ოქტომბერს ისრაელის სამხრეთში ჰამასის შეჭრის შედეგად დაიღუპა 1200 ადამიანი, ხოლო 240 მძევლად აიყვანეს. სექტორში მძიმე ჰუმანიტარული ვითარებაა.
