საქართველოს სახალხო დამცველი, ლევან იოსელიანი სოციალურ ქსელში პოსტს აქვეყნებს და აქციების მონაწილე ახალგაზრდების დემონიზების წინააღმდეგ გამოდის. ამასთან, ის განმარტავს, რომ პოსტს აქვეყნებს როგორც მოქალაქე და არა როგორც სახალხო დამცველი.
„იშვიათად მინახავს ასეთი გულწრფელობა აქციაზე, ეს ამ თაობის მთავარი განმასხვავებელია ყველა დანარჩენისგან. მე ვიცი ვინ დგას იქ, ისინი ჩვენი შვილები, მათი მეგობრები, ჩვენი მეგობრების შვილები, მეზობლები, ნათესავები არიან. კატეგორიულად მიუღებელია მათი შეურაცხყოფა, დემონიზება, ან ნებისმიერი პოლიტიკური ნარატივისადმი მიკუთვნების მცდელობა! მაქვს განცდა, რომ ამ ახალგაზრდებმა საკუთარ თავში, აწმყოსთან ერთად, ის წარსულიც გააერთიანეს, რომელიც მათი მშობლების თაობაა (თუნდაც, ისინი განსხვავებულად უყურებდნენ ბევრ რამეს) და ის მომავალიც, რომელიც ცალსახად მათია, ამიტომ მათზე თავდასხმა აპრიორი მარცხისთვისაა განწირული. ჩვენ ვერ ვიქნებით მათ გარეშე და ისინი უჩვენოდ, რადგან ეს ერთი დიდი ოჯახია“, - წერს იოსელიანი, მაგრამ არ მიუთითებს - თუ ვინ ახდენს ახალგაზრდების დემონიზებას.
ლევან იოსელიანი თავის განცხადებაში ასევე გამოყოფს ძალადობის ფაქტს, როცა „მოქალაქეების ჯგუფი აქციის მონაწილეს წიხლებით გაუსწორდა“ და აღნიშნავს, რომ „ეს ის საშიში ზღვარია, რომლის შემდეგაც, უბნური ვენდეტები და გარჩევები იწყება“. სახალხო დამცველი, მოქალაქის პოზიციიდან, აღნიშნავს იმასაც, რომ ყველა მოძალადე უნდა დაისაჯოს და, რომ დაუშვებელია ძალადობა აქციის მონაწილეთა რიგებიდანაც.
„ამ ჯოჯოხეთს ძლივს დავაღწიეთ თავი და იქ არასდროს უნდა დავბრუნდეთ. სახელმწიფოს განსაკუთრებული პასუხისმგებლობა აკისრია ამ შემთხვევაში, მან არ უნდა დაუშვას ძალადობა, ხოლო მოძალადეებმა კანონის წინაშე უნდა აგონ პასუხი. ძალადობა დაუშვებელია შეკრების მონაწილეების მხრიდანაც, ყველას უნდა გვესმოდეს რომ სახელმწიფო ინსტიტუციებზე დგას და ამ ინსტიტუციებს პატივისცემა სჭირდება, პოლიციელების შეურაცხყოფა, გინება თუ ფურთხება კატეგორიულად მიუღებელია და მას გამართლება არ აქვს“, - წერს იოსელიანი.
ის ასევე აღნიშნავს, რომ სამოქალაქო პოზიციის დაფიქსირება „ადამიანის უფლებაა და არა ვალდებულება“ და ამიტომ გაუმართლებლად თვლის - „საამაყო სპორტსმენებისთვის“ მხარდაჭერის მოთხოვნასა და მათ მიმართ სიძულვილის ენის გამოყენებას.
„ისინი ბევრად მეტს აკეთებენ ჩვენი ქვეყნისთვის, ვიდრე ვინმეს სასარგებლოდ პოზიციის დაფიქსირება შეიძლება იყოს, მათ აქვთ უფლება, აკეთონ საკუთარი საქმე და არავის აქვს უფლება ამუნათოს ამისთვის“, - ვკითხულობთ ლევან იოსელიანის განცხადებაში. ის არ აკონკრეტებს - ვისთვის სასარგებლო პოზიციაზე ლაპარაკობს.
ცნობილ ადამიანებს და მათ შორის - სპორტსმენებს, საზოგადოების გარკვეული ნაწილი სთხოვს პოზიციის გამოხატვას „აგენტების კანონის“ წინააღმდეგ და საქართველოს ევროპული მომავლის მხარდასაჭერად. ისინი თვლიან, რომ სპორტსმენები, უპირველეს ყოვლისა, საქართველოს მოქალაქეები არიან და სამშობლოს გვერდში უნდა დაუდგნენ.
„ქართული ოცნების“ წარმომადგენლები, მათი მოკავშირეები და მხარდამჭერები აქციებში მონაწილე ადამიანებს, მათ შორის ახალგაზრდებს - რადიკალებად, მოძალადეებად, ვანდალებად და უზრდელებად მოიხსენიებენ.
4 მაისს, პრეზიდენტმა სალომე ზურაბიშვილმა უცხოელ ელჩებთან გამართულ შეხვედრაზე განაცხადა, რომ - პრობლემურია ხელისუფლების რიტორიკა და მთავრობა ახალგაზრდებს „სატანისტებს“ არ უნდა უწოდებდეს.
ფორუმი