გაეროს მაღალჩინოსნის თქმით, ომით გაჩანაგებულ ჩრდილოეთ ღაზაში "სრულმასშტაბიანი შიმშილია" - ექვს თვეზე მეტი დროის განმავლობაში მიმდინარე ომისა და ღაზაში საკვების შეტანაზე ისრაელის მხრიდან დაწესებული მძიმე შეზღუდვების პირობებში.
გაეროს საკვების პროგრამის დირექტორი, სინდი მაკკეინი ამ სიტყვებით გახდა ყველაზე მაღალი რანგის საერთაშორისო ოფიციალური პირი, რომელმაც განაცხადა, რომ ღაზის ჩრდილოეთში მომწყვდეული სამოქალაქო პირები უკვე სრული მასშტაბის შიმშილის პირობებში არიან.
"ეს შემზარავია", - უთხრა მაკკეინმა ტელეკომპანია NBC-ს 5 მაისის ინტერვიუში. "იქ შიმშილია - სრულმასშტაბიანი შიმშილი - ჩრდილოეთით, და ის სამხრეთისკენაც ვრცელდება".
ღაზაში ომს ბიძგი მისცა 7 ოქტომბერს სამხრეთ ისრაელზე ჰამასის თავდასხმამ, რომლის დროსაც მძევლად აიყვანეს 253 პირი. ისრაელის მონაცემებით, იერიშს ემსხვერპლა 1200-მდე ადამიანი.
ისრაელმა ამას უპასუხა ღაზაზე შეტევით, საჰაერო და სახმელეთო იერიშებით, რასაც, ღაზის ჯანდაცვის უწყების ცნობით, 34 500-ზე მეტი პალესტინელი შეეწირა.
პალესტინელებს არ აქვთ საკვები, საწვავი და მედიკამენტები, ისრაელის შეტევის შედეგად შექმნილია მწვავე ჰუმანიტარული კრიზისი, განადგურებულია ტერიტორიის დიდი ნაწილი.
ფორუმი