აშშ-ის სახელმწიფო მდივნის ვიზიტის შემდეგ საქართველოში ბევრი ვარაუდობდა ადმინისტრაციულ-პოლიტიკური ვნებების მოთოკვას, მედიაზე წნეხის შემსუბუქებას და წინასაარჩევნო პროცესის ცივილიზებულ კალაპოტში მოქცევას. თუმცა, სამწუხაროდ, ბოლო ორი დღეა პროცესები საქართველოში ელვის უსწრაფესად და თანაც ყველაზე უარესი სცენარით ვითარდება.
ჰილარი კლინტონი სამხრეთ კავკასიას გაცილებულიც არ იყო, რომ საქართველოს კომუნიკაციების ეროვნული კომისიის გადაწყვეტილებით, ტელეკომპანია „მე-9 არხს" გაეთიშა მეტრული მაუწყებლობა, რომლითაც აღნიშნული ტელევიზია სულ ორი დღით სარგებლობდა შპს „სტერეო+“-სთან გაფორმებული კონტრაქტის წყალობით; იმავე დღეს, 7 ივნისს, კონტროლის პალატამ კოალიცია „ქართული ოცნების“ ლიდერი ბიძინა ივანიშვილი სამართალდარღვევათა სუბიექტად ცნო და შესაბამისი ოქმები გაუგზავნა სასამართლოს; ასევე იმავე დღეს პროკურატურამ ამომრჩეველთა მოსყიდვის ბრალდებით დააკავა კოალიცია „ქართული ოცნების“ აქტივისტები გრიგოლ ამბროლაძე, მიხეილ მესხი და მიხეილ ამაშუკელი.
გარდა ამისა, დამოუკიდებელ რადიომაუწყებლებს უსიამოვნო სიურპრიზი მოუმზადა კომპანია „თბილისის მიკროავტობუსმა“, რომელმაც 6 ივნისს თბილისის ქუჩებში მოძრავ რამდენიმე ათას მიკროავტობუსში ოპერატიულად დახსნა რადიომიმღებები და ნაცვლად ამისა, ავტობუსების სალონებში დაამონტაჟა სპეციალური მონიტორები, რომლებითაც მგზავრები მხოლოდ სარეკლამო ინფორმაციას მიიღებენ.
არადა, ეს ხდება იმ ფონზე, როდესაც საქართველოს ხელისუფლება აგრძელებს ჰილარი კლინტონის ვიზიტის მნიშვნელობაზე საუბარს, ხოლო სახელისუფლებო მედია დაუღალავად იმეორებს იმ მესიჯებს, რომლებიც სახელმწიფო მდივანმა ბათუმში შეხვედრების დროს რამდენჯერმე გამოთქმით წაიკითხა და მალევე გადასცა სამდივნოს სახელმწიფო დეპარტამენტის საიტზე გამოსაქვეყნებლად, რათა თავიდან აეცილებინა შემდგომი ინტერპრეტაციის საფრთხე.
„მოვუწოდებთ საქართველოს ლიდერებს, უზრუნველყონ კონკურენტუნარიანი კამპანია, რათა არჩევნები იყოს თავისუფალი და სამართლიანი - როგორც უშუალოდ არჩევნების დღეს, ასევე მანამდე დარჩენილი თვეების განმავლობაში,“- ეს ითქვა სტრატეგიული პარტნიორობის პლენარული სესიის გახსნაზე, რომელსაც პრემიერ-მინისტრ ნიკა გილაურის თამადობით, საქართველოს ლამის მთელი მთავრობა ესწრებოდა.
შემდეგ იგივე მოწოდება, ოღონდ ცოტა უფრო ვრცლად, ჰილარი კლინტონმა ერთობლივ პრესკონფერენციაზე მაღალი სტუმრის გვერდით მდგარ და ამ დონის ვიზიტით აშკარად კმაყოფილ მიხელ სააკაშვილსაც გაუმეორა.
„დღეს მე შევხვდი ოპოზიციური პარტიების ლიდერებს და საქართველოს დემოკრატიული განვითარების საქმეში მათი მნიშვნელოვანი როლი განვიხილე. ამერიკის შეერთებულ შტატებს სჯერა, რომ კონკურენტული ენერგიები და იდეები წარმართავენ დემოკრატიულ პროცესს; სამოქალაქო აქტიურობა, ღია დებატები და თანაბარი პირობები, მოქალაქეთათვის ინფორმაციის ხელმისაწვდომობა – ყველაფერი ეს ძალიან მნიშვნელოვანია იმ დროს, როდესაც საპარლამენტო არჩევნებისკენ და შემდეგ უკვე საპრეზიდენტო არჩევნებისკენ მიდიხართ“, – განაცხადა ბათუმის იუსტიციის სახლში ჰილარი კლინტონმა, რომელმაც იქვე მოუწოდა საქართველოს ხელისუფლებას, არ დაკარგოს დრო მომავალი საპარლამენტო არჩევნების პარალელურად ჩრდილოეთ კავკასიაში დაგეგმილ რუსეთის სამხედრო მანევრების საფრთხეზე საუბრით, რასაც, კონტროლირებადი მედიის საშუალებით, მანტრასავით იმეორებს და ოპოზიციის დისკრედიტაციისათვის მოხერხებულად იყენებს საქართველოს ხელისუფლება.
„დიახ, იქნება სამხედრო წვრთნები, მაგრამ ნამდვილად მნიშვნელოვანი მოვლენები ამ შემოდგომაზე საქართველოს შიგნით მოხდება, როდესაც ქართველი ხალხი არჩევანს გააკეთებს. მე ვერ მოვიფიქრებ ამაზე უფრო ძლიერ მესიჯს, რომელიც ვინმეს მსოფლიოში შეიძლება გაეგზავნოს“, განაცხადა სახელმწიფო მდივანმა და
დასძინა: „ყველაზე გადამწყვეტი მომენტი არის არა სხვა ქვეყნის სამხედრო წვრთნები, არამედ საქართველოს არჩევნები და ეს ილაპარაკებს უფრო ხმამაღლა, ვიდრე რომელიმე სამხედრო წვრთნა, იმის შესახებ, თუ რას უჭერენ მხარს ქართველები; თქვენი სიმტკიცის, თქვენი სიძლიერის, დემოკრატიის მიმართ თქვენი ერთგულების შესახებ.“
რამდენიმე უსიამოვნო ფაქტის თანხვედრა, რაზეც ბლოგის დასაწყისში ვისაუბრე, შესაძლოა, ჯერ კიდევ არ იყოს საკმარისი საბუთი კატეგორიული დასკვნების გასაკეთებლად და იმის სათქმელად, რომ საქართველოს ხელისუფლება წონასწორობიდან გამოიყვანა ჰილარი კლინტონის დაჟინებულმა მოწოდებებმა და ახლა განზრახ იქცევა გამომწვევად. ანდა, პირიქით, მიხეილ სააკაშვილმა კვლავ თავისებურად, ერთგვარ პოლიტიკურ ინდულგენციად ჩათვალა კლინტონის ვიზიტი, სტუმრის მეგობრული ქათინაურები და კეთილი რჩევები. საქართველოს ხელისუფლება ასეთ ინტერპრეტაციებს ადრეც რომ მიმართავდა, ამაზე კარგად დაწერა თომას დე ვაალმა სტატიაში
„კლინტონი საქართველოში მიდის“.
თუმცა, „მე-9 არხის" გათიშვა მეტრული სიხშირიდან, კონტროლის პალატის მიერ კოალიცია „ქართული ოცნების“ ლიდერის „სამართალდარღვევათა სუბიექტად“ განსაზღვრა, დაბოლოს პროკურატურის მიერ კოალიციის სამი აქტივისტის დაკავება, შეუძლებელია ჩაითვალოს იმ „ძლიერ მესიჯად“, რომლის გაგზავნასაც ჰილარი კლინტონი, აშშ-ის ადმინისტრაცია და, ზოგადად, დასავლეთის ქვეყნები შეიძლება მოელოდნენ საქართველოსგან მისი ისტორიისათვის ყველაზე „მნიშვნელოვანი არჩევნებისაკენ“ სავალ გზაზე.