4 ნოემბერს რადიო თავისუფლების დილის გადაცემის სტუმარი იყო გიორგი ბურჯანაძე, "ფონდ ღია საზოგადოება - საქართველოს" ადამიანის უფლებათა პროგრამის კოორდინატორი. მან ილაპარაკა გამოკვლევაზე, რომელიც გამოაქვეყნეს ფონდმა “ღია საზოგადოება - საქართველომ” და ციხეების კვლევების საერთაშორისო ცენტრმა. გამოკვლევის მიზანი იყო 2006-2012 წლებში საქართველოს საპატიმროებში წამებისა და არაადამიანური მოპყრობის გავრცელებისა და მიზეზების შესწავლა. ციხეებში არსებული წამების და მათი ვიდეოგადაღების მიზეზების, მასშტაბისა და შედეგების შესწავლა ადგილობრივმა და საერთაშორისო უფლებადამცველებმა 2013 წელს დაიწყეს. ანგარიში მოიცავს პატიმრებთან და ყოფილ პატიმრებთან ჩატარებული გამოკითხვის სრულიად ახალი, ემპირიული გამოკითხვის მონაცემებს, რომელიც "ფონდმა ღია საზოგადოება - საქართველომ” და მისმა პარტნიორმა ორგანიზაციებმა განახორციელეს. კვლევის პროცესში, პირდაპირი ინტერვიუების სახით იქნა გამოკითხული 1200 მსჯავრდებული, რომელთაგან 600 ყოფილი პატიმარია.
