საქართველოს ქვედანაყოფის რაოდენობა ავღანეთში მიმდინარე საერთაშორისო უსაფრთხოების ოპერაციაში განახევრდა, თუმცა მისთვის დაკისრებული რთული და საპასუხისმგებლო ამოცანები არ კლებულობს. 800-მდე სამხედრო მოსამსახურე ნატოს ქვეყნების წარმომადგენლებთან ერთად ყანდაარის პროვინციაში იმყოფება, სადაც თვე-ნახევრის წინ ქართველ ჯარისკაცებს თალიბების სერიოზული იერიშის მოგერიება მოუხდათ. მსოფლიოს ერთ-ერთ ყველაზე ცხელ წერტილში მყოფი ქართული ქვედანაყოფის მისიაზე, ყოველდღიურ საფრთხეზე, ნატოს ქვეყნების ჯარისკაცებსა თუ ადგილობრივ ავღანურ მოსახლეობასთან ურთიერთობაზე ლაპარაკობს სქართველოს სამხედრო მისიის ხელმძღვანელი, პოლკოვნიკი ჯონი ტატუნაშვილი, რომელსაც სკაიპის საშუალებით დავუკავშირდით ავღანეთში.