პოლონეთი ლეხ და მარია კაჩინსკების დასაკრძალად ემზადება

პოლონეთი ემზადება პრეზიდენტ ლეხ კაჩინსკისა და მისი მეუღლის, მარიას, დასაკრძალად, რომლებიც - 94 სხვა პირთან ერთად - 10 აპრილს მომხდარ ავიაკატასტროფაში დაიღუპნენ.

მსოფლიოს ლიდერთა დიდი ნაწილი დაკრძალვის ცერემონიაზე ჩასვლას ვერ ახერხებს, რადგან ისლანდიაში ვულკანის ამოფრქვევის შედეგად შექმნილი ფერფლის ღრუბელი მნიშვნელოვნად აფერხებს საავიაციო მიმოსვლას. აშშ-ის პრეზიდენტმა ბარაკ ობამამ უკვე გამოაცხადა, რომ ვერ გაემგზავრება პოლონეთში. კრაკოვში ვერ წავლენ, აგრეთვე, საფრანგეთის პრეზიდენტი ნიკოლა სარკოზი, გერმანიის კანცლერი ანგელა მერკელი, დიდი ბრიტანეთის ტახტის მემკვიდრე ჩარლზი და სხვა ოფიციალური პირები.

კრაკოვში იმყოფება საქართველოს პრეზიდენტი მიხეილ სააკაშვილი. როგორც ჩვენი კორესპონდენტი იტყობინება, ხალხმა მას საგანგებო ოვაცია მოუწყო. ისევე, როგორც რუსეთის პრეზიდენტ დმიტრი მედვედევს. მრავალთა აზრით, კაჩინსკის დაღუპვასთან დაკავშირებულმა გარემოებებმა შესაძლოა გარკვეული როლი ითამაშოს, რუსეთსა და პოლონეთს შორის ურთიერთობების გაუმჯობესებაში.

ლეხ და მარია კაჩინსკებს კრაკოვის ვაველის ტაძარში დაკრძალავენ. შაბათს ვარშავაში გამართულ სამგლოვიარო მიტინგზე 100 ათასზე მეტი ადამიანი მივიდა, მათ შორის პრემიერ-მინისტრი დონალდ ტუსკი და პრეზიდენტის მოვალეობის შემსრულებელი ბრონისლავ კომოროვსკი.