კახა შარტავა: ”ეროვნული ფორუმი ე.წ. ადგილობრივი თვითმმართველობის არჩევნებში მონაწილეობას არ აპირებს”

დიდი ხანია ველოდებით ალტერნატიულ გზას.არ დაიგვიანოთ.იმოქმედეთ.დრო არ ითმენს.გთხოვთ ენის მოჩლექით არავის ელაპარაკოთ,ალასანიასაც და მითუმეტეს სხვებს. სიმართლე და წიგნი დადაარჩენს საქართველოს,ეს თქვენ არ გაკლიათ ამიტომ დროა გაბედულად იმოქმედოთ

დიდი მადლობა ბატონო კახა! თქვენი პასუხი ჩემს შეკითხვაზე-სრულიად დამაკმაყოფილებელი და მისაღებია. თავიდან ბოლომდე მივადევნე თქვენს პასუხებს ყურადღება და ავღნიშნავ, ბევრ საკითხში გეთანხმებით. დიდი მადლობა ქალბატონ იას ყველასადმი ასეთი გულისხმიერებისათვის. ქალბატონო ია, თუ საშუალება იქნება, გია მარიამიძის მისამართი დამიდგინოთ: ახლოს გაცნობისათვის. პატივისცემით დავით რაზმაძე

”იანეთელებო”, საინტერესო შეკითხვები მივიღე, ჩემთვისაც ბევრ რამეს გავეცი პასუხი. არ ვიცი, რამდენად მოვახერხე ამომწურავი ანალიზის მოწოდება. თუ ასეთი შეკითხვები აწუხებს საზოგადოებას, მას სრულფასოვანი სახელმწიფოს ჩამოყალიბებაც ძალუძს. თქვენ ეს კიდევ ერთხელ დაადასტურეთ. ამისთვის გმადლობთ. მომავალ შეხვედრამდე ”იანეთში” და გამთლიანებულ საქართველოში.

”ეროვნული ფორუმის” წევრთა, კანდიდატთა და აქტივისტთა რიცხვი 10 000 კაცს აღწევს. რაც შეეხება დაფინანსებას, პარტია, საქართველოს კანონმდებლობით, როგორც კვალიფიციური სუბიექტი, ფინანსდება საქართველოს ბიუჯეტიდან და საქართველოს მოქალაქეების შემოწირულობებიდან. ფინანსური ანგარიში გამოქვეყნებულია ქართულ პრესაში და ორშაბათიდან განთავსდება ჩვენს ვებ-გვერდზე - www.forumi.ge.

ბატონო დავით, პრინციპულად ვიზიარებ თქვენს დამოკიდებულებას. ვერც ვერაფერს დავამატებ, არც არაფერს მოვაკლებ, თუმცა, ქვეყნის წინაშე არსებული საფრთხეებიდან გამომდინარე, სამსჯელო თემები რჩება. მსჯელობა პრინციპების ღალატს არ ნიშნავს. და თუ პრინციპები გამორიცხავს მსჯელობას, ვუერთგულოთ პრინციპებს.

პატივისცემით, თემურს. შეიძლება ვცდები, მაგრამ სერიოზულად დასმული შეკითხვა ”როგორ” და, რაც მთავარია, რითი, რატომ და რისთვის - არასოდეს დასმულა. გადამწყვეტი მაინც იყო როდის, თანაც - ”როდის ვამთავრებთ”, დაწყება, სწორად დაწყება, შედეგამდე მისვლის რთული პროცესი აბეზარ თემად იყო მიჩნეული ობიექტური და სუბიექტური მიზეზების გამო. არასოდეს მიპასუხია შეკითხვაზე როდის, ყოველთვის ვანაცვლებდით ”ფორუმელები” ამ შეკითხვას შეკითხვით ”როგორ” და გთავაზობდით ჩვენეულ პასუხს. როდის დავიწყოთ, ეს შეკითხვა დღის წესრიგში უკვე აღარ დგას, თქვენც ხედავთ, რომ სინამდვილეში პროცესი დაწყებულია და ჩვენი ამოცანა ამის დასრულებაა. დასრულების ვადა მიხეილ სააკაშვილის მიერ შემოფარგლულია 2013 წლით ან შემდგომი უსასრულობით. ჩვენ ვირჩევთ 2010 წელს.

სოლომონი from: თერნალს: როგორ შევკადრო პასუხი სოლომონს. თქვენი შეკითხვა პასუხია ამომწურავი. ასეთი შეკითხვის ავტორს, ალბათ, ვერ ავცდებით განგებით და პირადი შეხვედრისას უკეთ დავგეგმავთ იმას, რისი განხორციელების აუცილებლობაზეც მიგვითითებთ, ღრმად პატივცემულო სოლომონ. ყველაფერში სოლომონსაც კი ვერ დავეთანხმები... შენ იცი, მე ვიცი, ჩვენ ვიცით. პატივისცემით...
P.S. ყველაფერი განქარდება, განქარდება ესეც...
დარწმუნებული ვარ, სერიოზული საუბარი და საქმე წინ გველოდება. ეს თქვენს შეკითხვაში ამოვიკითხე, დიდი მადლობა.

პასუხი g.o-ს: დღეს გაბატონებულ რეჟიმთან ბრძოლის მეთოდად და მის შესაცვლელად მის მიერვე შემოთავაზებული ფსევდო-საარჩევნო თამაში არ გამოდგება. არჩევნებით უზურპატორის მოშორების შანსი ჩნდება მხოლოდ იმ შემთხვევაში, როცა მოსახლეობა და ამომრჩეველი თავად ნიშნავს და ანიშნინებს არჩევნებს საკუთარი პირობებით. არჩევნები უნდა მოვიგოთ არჩევნების დანიშვნის დღემდე. ამას სჭირდება სერიოზული საზოგადოებრივ-პოლიტიკური ბრძოლა, მათ შორის, საარჩევნო გარემოს შექმნისათვის. ვინაიდან თხოვნით, რეკომენდაციებით, ხვეწნა-მუდარით რეჟიმის მოსაცილებელი საარჩევნო გარემოს შექმნა შეუძლებელი ჩანს. საერთო-ეროვნული ნების მკაფიოდ დასაფიქსირებლად საჭირო ხდება იმ მექანიზმის ამოქმედება, რომელსაც თქვენ გულისხმობთ ეროვნულ დაუმორჩილებლობაში. ამ უკანასკნელის მიზანი არა გადატრიალება, არა ნგრევა, არამედ სწორედ არჩევნების უფლების მოპოვებაა. მისი რეალიზების ერთ-ერთ ინსტრუმენტად, სურვილისა და ორგანიზების შემთხვევაში, შეიძლება გამოდგეს წარმომადგენლობითი ეროვნული ყრილობა. რევოლუცია გულისხმობს დამოკიდებულების შეცვლას ადამიანისადმი, ქვეყნისადმი, საქმისადმი, საკუთარი პასუხისმგებლობისადმი და შიშისადმი. ასეთი ტიპის ქმედება ერისათვის, რომელსაც თვითშენარჩუნებისათვის სახელმწიფოს ჩამოყალიბების უფლება-მოვალეობა გააჩნია, ლეგიტიმურზე ლეგიტიმურია. რეჟიმი, თავისთავად, არჩევნებით თუ სხვა მეთოდით, მისი შეცვლის საშუალებას არ მოგვცემს. ეს შესაძლებლობა მოსაპოვებელია და ამის საერთო-ეროვნული ნების ქმედითი გამოხატვა-დადასტურება სჭირდება. დაუმორჩილებლობის შინაარსიც სწორედ ამაში მდგომარეობს და მისი რეალური შედეგი სამართლიანი არჩევნებია. ამ შედეგამდე მისვლას რეალური საარჩევნო გარემოსათვის ბრძოლის დაწყება და მისი უზრუნველყოფისათვის აუცილებელი პირობების კატეგორიულად მოთხოვნა სჭირდება. კატეგოროულობას უსამართლობისადმი, ტერორისადმი, გაყალბებისადმი საერთო-ეროვნული, მოქალაქეობრივი, ადამიანური დაუმორჩილებლობის გარეშე ვერ მივაღწევთ. თუ შესაძლებელი იყო საერთო-ეროვნული მორჩილება, საერთო-ეროვნული დაუმორჩილებლობაც ასევე შესაძლებელი და მიღწევადია. სხვა საკითხია, გვინდა თუ არა ჩვენ ეს. და თუ არ გვინდა, მაშინ რა გვრჩება - რიტორიკული შეკითხვებით ერთმანეთთან შეჯიბრი და მორიგი მონობით ტკბობა გადაშენებამდე?! ამბობენ, კვდომაშიც შეიძლება იპოვო სიამოვნება. მაგრამ, ალბათ, ღირსეულად ცხოვრების ბოლომდე ცდა რამედ მაინც ღირს. მით უმეტეს, რომ ამისთვის საუკეთესოთა სისხლი უკვე ბევრჯერ დაღვრილა. ეს ის მსხვერპლია, რომელიც გარანტიაა გამარჯვებისა. ამაში თუ არ ვცდებით, მაშინ მოდის სწორედაც რომ ”ნაბიჯ-ნაბიჯ”. დარემუნებული ვარ, ახლა უკვე თქვენც იცით, ან მიხვდით, როგორ.

მოგესალმებით, ucxo, ხანდახან უცხო უფრო ახლობელია, ვიდრე უცნობი. გეთანხმებით, მაგრამ ვერ დაგეთანხმებით. კომპეტენტურობას, არგუმენტირებულობას თუ მოვითხოვთ, არგუმენტებსა და განცხადებებში ჩაძიებასაც კომპეტენტურად უნდა მივყოთ ხელი. რისი ახსნაც შეიძლებოდა და არ შეიძლებოდა, ახსნილია. იქნებ დაინტერესებულმა, შეწუხებულმა, გულდარდიანმა თანამემამულეებმა უკეთ მოვიძიოთ. გამეორებას, თავის მართლებას, დღევანდელ საქმეზე სწორად ფიქრი და მისი სწორად კეთება აჯობებს ჩვენი მხრიდან. საყვედურით არ ვამბობ, სიმართლის მაძიებელს გულწრფელად ვპასუხობ. ”გაუმჭვირვალეობას” რაც შეეხება, შეკითხვაც გაუმჭვირვალეა. ალიანსთან თუ სხვა პოლიტიკურ სუბიექტთან დაახლოება-არდაახლოების შესახებ პერიოდული ინფორმაციები ჩვენგან არ მოდის და ამაზე პასუხს ნამდვილად ვერ ვაგებთ. პასუხისმგებლობაში რასაც ვგულისხმობთ, ხანდახან იმასაც ნიშნავს, რომ იმაში, რაც არასწორად მიგაჩნია, იმაში მონაწილეობა არ მიიღო და ამის შესახებ ღიად და პირდაპირ უთხრა ადამიანებს, ვისაც ეს აინტერესებს. ხალხთან სიახლოვეც, ალბათ, ამას ნიშნავს და არა წამიერ საერთო გულისთქმას აყოლას, რომელიც ზიანის მომტან პოპულიზმად იქცევა ხოლმე (თუმცა, ეს ხანდახან ქულებს გმატებს). რაც შეეხება საარჩევნო სიების გადამოწმებას, ხელს არ შევუწყობთ (თქვენთან ერთად, იმედია) იმას, რომ გამყალბებელმა ხელისუფლებამ გაყალბების ლეგიტიმაციის დამატებითი ინსტრუმენტი ჩაიგდოს ხელში ჩვენი თანამონაწილეობით, მაგრამ პასუხისმგებლობა აგვიღია და ავიღებთ (იმედია, თქვენთან ერთად) იმაზე, თუ რატომ ვიქცევით ”ფორუმი” განსხვავებულად, როცა ეს ჩვენ სწორად მიგვაჩნია. და ამ სისწორეს ისევე დაამტკიცებს ამ ე.წ. სიებთან და არჩევნებთან მიმართებაში დრო და საქმე უახლოეს მომავალში. როგორც ეს 9 აპრილთან და 26 მაისთან მიმართებაში დაამტკიცა. ვისურვებდი, რომ სულ მოკლე ხანში ამის შესახებ საუბრის საშუალება კიდევ ერთხელ მოგვეცეს. ეს საუბარი ალბათ, უფრო გამჭვირვალე და გასაგები იქნება. სამწუხაროდ, ასე ხდება ხოლმე - პოსტფაქტუმ. წინასწარი გაფრთხილება, შეგონება უშედეგოა, მაგრამ საჭირო. ეს ჩვენს ვალდებულებასაც გულისხმობს, რომ მიუხედავად არაპოპულარობისა ან გაუგებრობისა, მაინც გითხრათ და ვიბრძოლოთ წინასწარ და პოსტფაქტუმ არ ვილაპარაკოთ ნიშნისმოგებით; ყოველთვის ვეძებოთ გამოსავალი თქვენთან ერთად. მორიგი შეცდომის დაშვების საფრთხის წინაშე ვდგავართ. იქნებ გვეფიქრა ამაზე, იქნებ შეგვეხსენებინა ერთმანეთისთვის, რომ სიების გადამოწმების ფსევდო-კამპანია არ არის დღეს მთავარი პრობლემა ქვეყნისათვის. იქნებ შევახსენოთ ერთმანეთს, რომ ამ პროცესს მიღმა ქვეყნის დაშლის ლეგალიზების სცენარი ჩვენს თვალწინ ხორციელდება. სიებთან დაკავშირებული აჟიოტაჟი არ წყვეტს არჩევნების სამართლიანობის პრობლემას საქართველოში. ის, თუ რამ შეიძლება დაგიცვათ თქვენ მორიგი ტყუილისა და გაყალბებისგან, უახლოეს დღეებში იხილეთ მიდია-საშუალებებით.

ალექსანდრეს from: მუხიანიდან: სწორი შეკითხვაა. გარანტია არ არსებობს. გარანტები ვართ მხოლოდ ჩვენ, ვინც არა მარტო ვაკისრებთ პასუხისმგებლობას, არამედ ვიღებთ, წინააღმდეგ შემთხვევაში, ”დრაკონის” დამმარცხებელი ”გმირის” მაძიებელი თავადვე შობს ”გმირში” ”დრაკონს” და თვითონ ხდება მისი მსხვერპლი (ასეთია ამ ზღაპრის მორალი). ეს უკვე გავიარეთ და ვიცით, რეგიონებში თავიანთი გასაჭირი, რა თქმა უნდა, თვითონ უკეთ იციან. ადამიანებს უფრო ვალაპარაკებთ, ვიდრე ველაპარაკებით. შეხვედრების მიზანი თავად შეხვედრებია. მათ, ვისაც დიდი ხანია, არწმუნებენ, რომ მათი აზრი და არსებობა არაფერს ნიშნავს, ვახსენებთ, რომ სინამდვილეში სწორედ მათზეა დამოკიდებული თითოეული მათგანის ბედი და ქვეყნის ავ-კარგი. თავიანთი ჭირი თავად უკეთ იციან და ”წამალსაც” პოულობენ. მათთან ერთად სწორი დიაგნოზის დასმა და რეცეპტის პოვნა - ეს არის ”ფორუმის” სამუშაო. ეს რეცეპტები დაწერილია, დაწერილია ქართულად. ჩვენი ამოცანა ეს იყო და თქვენი სურვილიც, ალბათ, ეს არის. ამ რესეპტების წაკითხვა სულ ცოტა ხანში შეგეძლებათ და არ გაგიჭირდებათ. მომავალი ”დრაკონების” სახელით დღევანდელ ”გმირს”.

ვპასუხობ Citizen Journalist from: ვირჯინიიდან. გამახარა თქვენმა შეკითხვამ. დაგლოცოთ ღმერთმა,. საქართველოში დღეს თვითმმართველობის არარსებობის პირობებში, აქტუალური გახდა ადგილობრივი არჩევნების თემა ისე, რომ თვითმმართველობას არავინ კითხულობს. ”ეროვნული ფორუმის” არსებობის და აქტიურობის მოკლე ბიოგრაფიას თუ გავყვებით, ჩვენდა გასაკვირად, აღმოვაჩენთ, რომ ლაიტმოტივი ნამდვილი თვითმმართველობისთვის ბრძოლა ყოფილა. ქვეყნის შიგნით არსებული პრობლემების გადაწყვეტა თვითმმართველობის ფუნდამენტური პრინციპების შემოღება-დამკვიდრების გარეშე შეუძლებელია, შეუძლებელია ეკონომიკური კრიზისის დაძლევაც. ხაზს ვუსვამ: ჩვენთვის გასაოცარია ის ფაქტი, რომ თვითმმართველობის არჩევნებზე მწვავე დისკუსიებისას თავად თვითმმართველობაზე საერთოდ არ ვსაუბრობთ. ”ფორუმის” დამოკიდებულებას ამ უმნიშვნელოვანესი, ქვეყნის ცხოვრებაში გარდატეხის შემტანი საკითხისადმი უახლოეს დღეებში საჯაროდ იხილავთ და მოისმენთ. ასევე, შესაძლებლობა მოგეცემათ, დაწვრილებით გაეცნოთ ჩვენს საიტზე - www.forumi.ge - ორშაბათიდან. ჩვენს პოლიტიკურ პროგრამაში, რომელიც ითვალისწინებს სახელმწიფოს მოწყობის ხედვას, თვითმმართველობა, კლასიკური გაგებით, იგულისხმება იმ ფუნდამენტად, რომელზეც შენდება და რომლის ირგვლივაც ეწყობა მართვის სისტემა. ამ სისტემის რეგულატორი იქნება მხოლოდ და მხოლოდ კანონი, სამართალი და სასამართლო და მკაცრად, მკაფიოდ გამოკვეთილი უფლებამოსილებათა გამიჯვნა - უზრუნველყოფილი შესაბამისი ადგილობრივი ბიუჯეტებით. დაწვრილებით იხილეთ ჩვენს ვებ-გვერდზე.

მოგესალმებით. ხშირად მაწუხებს ხოლმე ეგ შეკითხვა, თუმცა, ამ შემთხვევასთან დაკავშირებით არა. გადაჭარბებული მოლოდინები, რომელიც ჩვენს მიერ არ იყო ინსპირირებული, ყოველთვის ასეთ შედეგს იძლევა, მიუხედავად ჩვენი მადლიერებისა იმ ადამიანებისადმი, ვისაც ეს მოლოდინი ჰქონდათ. არასწორად დაწყებული პროცესი ყოველთვის არასწორ შედეგს მოიტანს. ამის თქმისას ”ფორუმი” პირნათელია ამ ადამიანების და თქვენს წინაშე, ვინაიდან სავარაუდო, მოსალოდნელი შედეგების შესახებ წინასწარ გაფრთხილებდით. სწორედ ეს ნიშნავს პოლიტიკოსობას, ალბათ, რასაც ჩვენ არ ვიჩემებთ და არა საპროტესტო მუხტის სახელდახელო გამოყენებით საკუთარი თავის წარმოჩენის მცდელობა. საზოგადოების განწყობამ და მოთხოვნამ იძულებული და ვალდებული გახადა ”ფორუმი”, თქვენთან ერთად მიეღო მონაწილეობა იმაში, რის უშედეგობაში და არასწორად დაგეგმვაშიც ვცდილობდით დაგვერწმუნებინეთ წინასწარ. დროთა განმავლობაში, ალბათ, მოვიპოვებთ და დავიმსახურებთ იმის უფლებას, რომ აღარ ავყვეთ ე.წ. საერთო ფეხის ხმას და საზოგადოებრივი განწყობა მივმართოთ იმ ამოცანისკენ, რომლის გადაჭრაც აუცილებლად მიგვაჩნია და ისე, როგორც მიგვაჩნია სწორად. ეს უკვე ნამდვილი პოლიტიკოსობა იქნება და გამოვა იმ შემთხვევაში, თუ თქვენც იქნებით ამისთვის მზად. რთული პრობლემების მოგვარება უბრალო მეთოდებით შესაძლებელია, მაგრამ მარტივად და პრიმიტიულად - არა. თქვენი შეკითხვის სიღრმიდან გამომდინარე, ვიმედოვნებ, გამიგებთ სათქმელს. თქვენი შეკითხვის რეალური სიღრმეც და ჩვენი პოლიტიკოსობაც სწორედ ამით შეფასდება. შესაფასებლად დრო თითქმის არ გვრჩება. იფიქრეთ, ჩვენ ვიმოქმედებთ (ჩვენ უკვე ნაფიქრი გვაქვს). დიდი მადლობა.

ვაზუსტებ ირაკლისადმი გაცემულ პასუხს მაკოსთვის: თბილისის მერის არჩევნებში მონაწილე სუბიექტებისადმი დახმარებას უკვე ჩამოთვლილი მიზეზების გამო არ ვაპირებ პირდაპირი წესით. ერთადერთი, რაც მოგვეხმარება სულყველას და რითიც მივეხმარებით ერთმანეთს, ეს გახლავთ რეალური, სამართლიანი საარჩევნო გარემოს შექმნისათვის პოლიტიკური ბრძოლა იმ გამოცდილების გათვალისწინებით, რომელიც ჩვენ შევიძინეთსაპრეზიდენტო და საპარლამენტო არჩევნების დროს. ჩვენთვის ეს პროცესი ნიშნავს სააკაშვილის რეჟიმის შემცვლელ საპრეზიდენტო და საპარლამენტო არჩევნებამდე მისვლას. თბილისის მერობისთვის ბრძოლას, ამ ბრძოლაში მეორე, მესამე, მეოთხე ადგილებისთვის ჭიდაობაში ვინმესთვის დახმარების აღმოჩენას არ ვაპირებთ. იმედია, თქვენს შეკითხვას ვუპასუხე.
რაც შეეხება გოჩა ჯოჯუას, გოჩა იყო ”ეროვნული ფორუმის” საინიციატივო ჯგუფის წევრი, კარგი მეგობარი, მაგრამ არ არის ”ფორუმის” წევრი 2006 წლის ბოლოდან. ”ეროვნული ფორუმი”, როგორც იურიდიულად რეგისტრირებული პოლიტიკური გაერთიანება, ჩამოყალიბდა 2008 წლის თებერვალში. გოჩა რჩება და დარჩება კარგ მეგობრად, ახლობელ ადამიანად, მაგრამ ის არის ”ქრისტიან-დემოკრატი” - დღეს.

ბოგესალმებით, თორნიკე. სერიოზული შეკითხვაა, რომელზე პასუხიც დამოკიდებულია იმაზე, თუ რომელი სისტემისთვის არის ან იქნება მზად საქართველო. ჩვენი ქვეყნის დღევანდელ რეალობას ვერ მოერგება და არ მოუხდება არც ერთი კლასიკური სისტემა. გთხოვთ, მომიტევოთ კატეგორიულობისათვის. გამომდინარე აქედან, შესაქმნელია ის რეალობა, რომელიც სისტემას მოირგებს და რომელსაც სისტემა გამოადგება. თუ შევეხებით დღეს პოპულარულ, მაგრამ დაუკონკრეტებელ იდეას საპარლამენტო რესპუბლიკის შესახებ, მის ჩამოყალიბებას ფუნდამენტიდან ჭირდება დაწყება. სამომავლოდ ჩვენთვის სასურველ და მისაღებ საპარლამენტო რესპუბლიკას განსახორციელებლად ესაჭიროება რეალური პირდაპირი წესით არჩევნებითა და საკუთარი ბიუჯეტით უზრუნველყოფილი თვითმმართველობების ჩამოყალიბება. თუმცა, ამასთან ერთად, სხვა კრიზისული სიტუაციებიც იქნება დასაძლევი. გადასვლა სხვა სისტემაზე ზემოთქმულიდან გამომდინარე, უნდა იყოს ბუნებრივი და ისტორიულად განპირობებული, პოლიტიკურად აწონილ-დაწონილი, საზოგადოებრივად მხარდაჭერილი. რაც შეეხება კონსტიტუციურ მონარქიას, საქართველოს ისტორიული არსიდან გამომდინარე, საინფორმაციო-ტექნოლოგიურ მომავალშიც კი, შესაძლებლად მიმაჩნია. ამ საკითხში სუბიექტური ვარ, ვინაიდან მონარქიის მოშლა საქართველოში არ იყო ქართველი ერის გადაწყვეტილება და მისი ძალისხმევის შედეგი. თუნდაც ისტორიული სამართლიანობის აღდგენის გამო არ ვიქნებოდი ამის წინააღმდეგი მომავალში. საპარლამენტო რესპუბლიკა მიმაჩნია გასავლელ და გამოსაცლდელ ეტაპად ნებისმიერ შემთხვევაში.

დიდი მადლობა ამ შეკითხვისთვის ”კაპიტანს” ”სერჟანტისგან”. ამ საკითხით დღეს ძალიან ცოტა ვინმე თუ ინტერესდება. თვითმმართველობის არარსებობამ, სიდუხჭირემ, შესაძლებლობათა და რესურსების თავმოყრამ თბილისსა და ცენტრალურ ხელისუფლებაში რეგიონები დააცარიელა. ამან რეგიონებში პერსპექტივის შეგრძნება მოკლა. შესაბამისად, ყველა აქტიური, ავტორიტეტული, ინიციატივიანი პიროვნება გასულია დედაქალაქში ან ქვეყნის გარეთ. ეს, თვის მხრივ, რეგიონებში ამორფულ სიტუაციას ქმნის. მიუხედავად ამისა, ცხოვრების ქარტეხილებმა მოსახლეობა ისე გამობრძმედა, რომ შეგნებულობის და მოტივირებულობის, ცვლილებათა სურვილის ძალიან მაღალი ხარისხი აღმოავჩინეთ რეგიონებში. საქმის დასაწყებად მაინც აუცილებელი ხდება პირველ რიგში ისეთ ადამიანთა მოძიება, რომელთაც აქვთ ავტორიტეტი, რეპუტაცია და ნდობა. მათ გარეშე რეგიონებში სერიოზული ორგანიზაციული, საინფორმაციო და გამაერთიანებელი საქმიანობის წარმოება ძალიან ძნელია, საბედნიეროდ, ასეთი პიროვნებები თითქმის ყველა რეგიონში, დასახლებულ პუნქტში, ქალაქსა თუ სოფელში მოიძებნებიან. მათზე დაყრდნობით და მათთან ერთად ”ფორუმმა” მოახერხა, შეძლო 43 ადგილობრივი ორგანიზაციისა და საინიციატივო ჯგუფის ჩამოყალიბება. ამის კვალდაკვალ მიმდინარეობს არაპარტიული სამოქალაქო კომიტეტების ფორმირება, რომელთაც სოლიდარობის ბადით უნდა მოიცვან მთელი საქართველო. ამის რესურსი ქვეყანაში არსებობს და ის უნდა გამოვიყენოთ. ამან უნდა მოგვცეს რეალური თვითმმართველობის საფუძველიც სამომავლო რეფორმებისათვის. არავითარ შემთხვევაში არ შეიძლება დედაქალაქის და რეგიონების მოწყვეტა ერთმანეთისგან. პირიქით, კავშირი უნდა იყოს მჭიდრო და ბუნებრივ-ისტორიული. ”ეროვნული ფორუმი” ამას ძალისხმევას არ აკლებს, არ დააკლებს და ამის შედეგს სულ მალე ვიხილავთ. მიუხედავად დაშინების, გაჭირვების, მძიმე ფონისა, რეგიონებში დაიბადება ის ტალღა, რომელიც თბილისთან ერთად მთელ საქართველოს რეალური ცვლილებისკენ წაიყვანს სერიოზული ბრძოლის შედეგად. პატივისცემით, ”სერჟანტისგან” ”კაპიტანს.”

დიდი მადლობა, თამუნა, იმისათვის, რომ ეს ტკივილი და ასეთი საფიქრალი გაწუხებთ. დღეს ამას ნაკლები ყურადღება ექცევა და ეს მიზანმიმართულად ხორციელდება. პირველი: არც ერთ შემთხვევაში არანაირი საფრთხის შიშით არ შეიძლება იმის დათმობა, რამაც ეს სისხლი და სასაფლაოები მოგვიტანა, არ შეიძლება შეგუება, არ შეიძლება ლაქუცი ”უარესის შიშით” არც შიდა, არც გარეშე მტერთან. რა უნდა გაკეთდეს? აუცილებელია, აღიარებულ იქნას დაშვებული პოლიტიკური შეცდომები, დაუყოვნებლივ გაუქმდეს ე.წ. არარსებული სამხრეთ ოსეთი - არავითარი ოსეთის არანაირი სამხრეთი საქართველოში არ არსებობს და არც არასოდეს უარსებია. უნდა გაუქმდეს კოდორის ხეობის ე.წ. ზემო აფხაზეთად გადაკეთების გადაწყვეტილება. მაქსიმალურად უნდა შეიქმნას ხელშემწყობი გარემო რუსეთის მხრიდან საქართველოს ტერიტორიების ოკუპირების საერთაშორისო აღიარებისათვის. ეს საკითხი ამ შინაარსით დღის წესრიგში არასოდეს დამდგარა. საქართველოს ქმედებამ თავად მისცა საბაბი და საშუალება რუსეთს ე.წ. სამხრეთ ოსეთის და აფხაზეთის (”ზემო აფხაზეთიანად”) მიტაცებისა. ამავე დროს, საერთაშორისო საზოგადოებრიობას გამოაცალა რეალური და ლეგიტიმური საფუძველი რუსეთის ოკუპანტად აღიარებისა. საქართველოს ანტიკონსტიტუციური ხელისუფლება ამ საკითხებს ოფიციალურად გაეროში, სხვა საერთაშორისო ორგანიზაციებში არ აყენებს და ვერც დააყენებს, ვინაიდან სწორედ მისი მხრიდან დაშვებული პოლიტიკური შეცდომების შედეგია დღეს არსებული რეალობა. შეცდომების დაშვება გრძელდება. რუსეთთან საჰაერო მიმოსვლის აღდგენის შესახებ გადაწყვეტილების მიღება, ლარსის საბაჟო-გამშვები პუნქტის გახსნის თაობაზე რუსეთისადმი მიმართვა, ჟენევის ფორმატში წარმოებულ მოლაპარაკებათა შინაარსი და ოკუპირებულ ტერიტორიებთან ურთიერთობის ე.წ. ახალი სახელმწიფო კონცეფცია დღევანდელი სტატუს-კვოს ლეგალიზებას, დე-იურე გაფირმებას გულისხმობს. აქედან გამომდინარე, მეორე, რაც უნდა გაკეთდეს, ანუ უპირველესი - შიდა დამპყრობელი მმართველი რეჟიმის სახით უნდა შეიცვალოს უპირობოდ. წინააღმდეგ შემთხვევაში, ყოველთვის უძლურები ვიქნებით გარეშე მტერთან ბრძოლაში. ცვლილების განხორციელება დაუშვებელია ე.წ. პროდასავლური თუ ე.წ. პრორუსული განწყობების ხელოვნურად შექმნით და მათით მანიპულირებით. ერთადერთი მამოძრავებელი ძალა ნებისმიერი შიდა ცვლილებისა და საგარეო ვექრორების არჩევისა უნდა იყოს ეროვნული ინტერესები.

მოგესალმებით, ირაკლი, ქართულ ხმას ფილადელფიიდან. ე.წ. არჩევნებში მონაწილეობის არმიღება საქართველოს სინამდვილეში თავისთავად პოზიციაა, თუმცა, ეს არ არის საკმარისი, ამაში, რა თქმა უნდა, გეთანხმები. ქვეყნის წინაშე ძალიან ბევრი პრობლემა დგას, რომელთა მიჩქმალვა საკმაოდ ოსტატურად ხერხდება არარსებული თვითმმართველობის ე.წ. არჩევნების თემაზე ყურადღების გადატანით. ეს კამპანია სინამდვილეში გადიქცა თბილისის მერის პოსტისათვის ბრძოლის არც თუ ჯანსაღ კამპანიად, რასაც თქვენი შეკითხვაც ადასტურებს. თქვენს შეკითხვაში ქვეყანაში დემოკრატიულ ცვლილებებზე, ადგილობრივ თვითმმართველობაზე ყურადღება არ არის გამახვილებული და ეს ბუნებრივია. ლაპარაკია მხოლოდ მერის კანდიდატურაზე, სავარაუდო ვარიანტებზე, რასაც გამარჯვების თუ დამარცხების შემთხვევაში, არანაირი სასარგებლო, სასიკეთო ნაყოფი ქვეყნისთვის არ მოაქვს, მით უმეტეს, რომ დღევანდელი სიტუაციიდან გამომდინარე, ე.წ. საერთო კანდიდატიც კი დამარცხებისთვის ანუ საპატიო მეორე ადგილისთვის არის განწირული უკეთეს შემთხვევაში. არის ერთი რამ, რომელიც ყველას გვაერთიანებს, ან უნდა გვაერთიანებდეს - ნორმალურ რეჟიმში დემოკრატიული ცვლილებების განხორციელება საქართველოში სასურველია სამართლიანი, არჩევნების გზით, რომელიც ცვლის ხელისუფლებას, მის მმართველ გუნდს. ამას აუცილებლად ჭირდება სამართლიანი, ნორმალური საარჩევნო გარემოსათვის ერთიანი ბრძოლა საზოგადოების ყველა წარმომადგენლის მონაწილეობით საქართველოშიც და საქართველოს შვილების მხრიდან, დედამიწის რომელ კუთხეშიც არ უნდა იმყოფებოდნენ ისინი. ეს არ არის რთული. არსებობს ძალიან მარტივი სქემა, რომელიც ჩვენი გამოცდილებიდან გამომდინარე, ზუსტად გვკარნახობს, თუ რა ნაბიჯებია გადასადგმელი იმისათვის, რომ ერთი მხრივ, არჩევნები დაცული იქნას გაყალბებისგან, ხოლო მეორე მხრივ, საარჩევნო გარემოსათვის რეალურ ბრძოლაში ოპოზიციამ ისე წარმოაჩინოს თავი, რომ ბუნებრივად დადგეს საკითხი ქვეყანაში პოლიტიკურ ძალთა გადანაწილებისა, რაც ავტომატურად გულისხმობს საპრეზიდენტო და საპარლამენტო არჩევნების ჩატარების გარდაუვალობას და არა მერის არჩევისთვის ოპოზიციას შორის ურთიერთჭიდაობას. უნდა მოგახსენოთ, რომ დღეს არსებულ ვითარებაში რომელიმე ოპოზიციური კანდიდატის ნაკლებად სავარაუდო გამარჯვებაც კი არავითარი რეალური ცვლილების მომტანი არ გახლავთ, ხოლო დამარცხების შემთხვევაში, რისი ალბათობაც გაცილებით მაღალია, ვითომ საერთო კანდიდატის წაგებას სჯობს, ყველამ ცალ-ცალკე წააგოს. იმედია, გამიგებთ, რასაც ვგულისმობ. საარჩევნო გარემოსათვის ძალთა გაერთიანებისათვის აუცილებელი ამოცანის გამოკვეთაზე მუშობა პრაქტიკულად დასრულებულია ჩვენი მხრიდან. უახლოეს ხანებში თქვენ ფილადელფიაშიც ამის შესახებ გაიგებთ, ხოლო კონკრეტულ წინადადებებს, რასაც ჩვენ ვთავაზობთ საზოგადოებას, პაკეტის სახით ორშაბათიდან იხილავთ ჩვენს საიტზე - www.forumi.ge. ირაკლი ალასანიას წარმატება, გამარჯვება ქვეყნის სასიკეთოდ მიღწეული ყოველთვის გაგვიხარდება, მაგრამ თუ რაიმე საქმე არასწორად მიგვაჩნია, იმ საქმეში სხვისი წაქეზება უსინდისობა მგონია.სხვათა შორის, რთულ ვითარებაში, როცა შეიძლება წინ ვერ აღუდგე იმას, რაც უმსგავსობად მიგაჩნია, ის მაინც უნდა გააკეთო, რომ მასში მონაწილეობა არ მიიღო.

მოგესალმებით, ”იანეთის” ბლოგის წევრებს. მზად ვარ, შეძლებისდაგვარად სრულყოფილად ვუპასუხო თქვენს შეკითხვებს.