სლოვენიაში მიმდინარე 17 წლამდე ასაკის ფეხბურთელთა ევროპის ჩემპიონატზე წარმატებით ასპარეზობს საქართველოს ნაკრები. „ა“ ჯგუფის ბოლო, გადამწყვეტ შეხვედრაში ქართველმა ახალგაზრდებმა დაძაბულ ბრძოლაში სძლიეს ისლანდიის ნაკრებს (1:0) და ნახევარფინალის საგზური მოიპოვეს. გამარჯვების გოლი მატჩის დამთავრებამდე 6 წუთით ადრე გაიტანა დარციმელიამ. ამავე ჯგუფის მეორე შეხვედრაში გერმანიამ დიდი ანგარიშით (3:0) დაამარცხა საფრანგეთი და ასევე მოიპოვა ნახევარფინალში თამაშის უფლება. „ბ“ ჯგუფიდან საუკეთესოთა ოთხეულში გავიდნენ ჰოლანდია და პოლონეთი. 13 მაისს ლიუბლიანაში გაიმართება ნახევარფინალური შეხვედრები: გერმანია-პოლონეთი და საქართველო-ჰოლანდია. ფინალი 16 მაისისთვის არის დანიშნული.