სტუმრად ჩვენს ეთერში: ნინო ბალანჩივაძე და კოტე რუხაძე

22 ნოემბერს რადიო თავისუფლების დილის გადაცემის სტუმრები იყვნენ კოტე რუხაძე, არასამთავრობო ორგანიზაცია „ჰეპა+“ -ს აღმასრულებელი დირექტორი და ნინო ბალანჩივაძე, „ალტერნატივა ჯორჯიას“ იურისტი. მათ ისაუბრეს საპროტესტო აქციაზე - „ჩვენი რეპრესია, თქვენი რეგრესია!“, რომელიც ქუჩის ნარკოტესტირების წინააღმდეგ არის მიმართული. აქციას 24 ნოემბერს, შსს-სთან სათემო ორგანიზაციების წარმომადგენლები მართავენ. როგორც საპროტესტო აქციის ორგანიზატორები აცხადებენ, შსს არსებული დამსჯელობითი ნარკოკანონმდებლობის საფუძველზე კვლავაც აგრძელებს ნარკოტიკების მომხმარებელთა დასჯას. მათი თქმით, ერთ-ერთი ასეთი მეთოდია „ქუჩის ნარკოტესტირება“. პოლიციელებს მოქალაქეები გადაჰყავთ სპეციალურ დაწესებულებებში ნარკოტესტირების ჩასატარებლად, რასაც მოსდევს ადმინისტრაციული და სისხლისამართლებრივი სანქციები, რაც აქციის ორგანიზატორების თქმით, მძიმე ტვირთად აწვება ამ ადამიანებს და მათი ოჯახის წევრებს. რა ალტერნატიული წინადადებები აქვთ აქციის ორგანიზატორებს და როგორი უნდა იყოს ნარკოპოლიტიკა საქართველოში?..