ვლადივოსტოკში ამერიკელი ჯარისკაცი დააკავეს ქურდობის ბრალდებით

ვლადივოსტოკის რაიონულმა სასამართლომ ამერიკელი ჯარისკაცი გორდონ ბლეკი დააკავა ქურდობის ბრალდებით, იტყობინება სასამართლოს პრესმდივანი. სამხედრო მოსამსახურე წინასწარი დაკავების საკანში იქნება 2 ივლისამდე.

აშშ-ის მოქალაქეს ბრალად ედება ქურდობა მოქალაქისთვის მნიშვნელოვანი ზარალის მიყენებით. ამ მუხლით მაქსიმალური სასჯელია ხუთ წლამდე თავისუფლების აღკვეთა.

დღეს NBC News-ი იტყობინებოდა რუსეთში ამერიკელი ჯარისკაცის დაკავების შესახებ. მოგვიანებით ცნობილი გახდა მისი ვინაობა. ესაა უფროსი სერჟანტი გორდონ ბლეკი. ის სამხრეთ კორეაში მსახურობდა. სამსახურის დასრულების შემდეგ ბლეკი აშშ-ში უნდა დაბრუნებულიყო, მაგრამ მანამდე მან გადაწყვიტა, ვლადივოსტოკში მოენახულებინა შეყვარებული ქალი.

CNN-ი ამერიკელ მოხელეებზე დაყრდნობით იტყობინება, რომ უფროსი სერჟანტი 2 მაისს დააკავეს. ამჟამად ის საგამოძიებო იზოლატორში იმყოფება. აშშ-ის საელჩომ დაკავებულის ოჯახს შეატყობინა მომხდარის შესახებ. ის ცდილობს, ბლეკთან კონსულის შეხვედრას მიაღწიოს.

რუსეთის შინაგან საქმეთა სამინისტროს ვლადივოსტოკის წარმომადგენლობამ დაკავებას „წმინდა ყოფითი კრიმინალი“ უწოდა, ჯარისკაცის საქმე არაა დაკავშირებული ჯაშუშობასთან.

ამერიკელი ჯარისკაცის დაკავების შესახებ ცნობილია თეთრი სახლისთვის, ამის შესახებ იტყობინება ეროვნული უსაფრთხოების სფეროში თეთრი სახლის კოორდინატორი ჯონ კირბი.

აშშ-ის შეიარაღებული ძალების ოფიციალურმა წარმომადგენელმა სინტია სმითმა დაადასტურა, რომ მოსკოვმა, ვენის კონვენციის შესაბამისად, შეატყობინა ვაშინგტონს ამერიკელი სამხედროს დაკავების შესახებ.

„ვიმეორებთ ჩვენს სერიოზულ გაფრთხილებას საფრთხის შესახებ, რომელიც ემუქრებათ აშშ-ის მოქალაქეებს რუსეთის ფედერაციის შიგნით. აშშ-ის მოქალაქეებმა, რომლებიც ცხოვრობენ ან მოგზაურობენ რუსეთში, დაუყოვნებლივ უნდა დატოვონ ქვეყანა, როგორც აღნიშნულია ჩვენს რეკომენდაციებში რუსეთში მოგზაურობასთან დაკავშირებით“, - განაცხადა სახელმწიფო დეპარტამენტმა.

ასევე ნახეთ

ალსუ კურმაშევა ყაზანის ციხიდან: "მინდა აქედან ცოცხალი და ჯანმრთელი გამოვიდე"

რუსეთში ერთ წელზე მეტი ხნის წინ დააკავეს ამერიკელი ჟურნალისტი ევან გერშკოვიჩი. მთელი ამ ხნის განმავლობაში ის საგამოძიებო იზოლატორში იმყოფება. გერშკოვიჩს 20 წლით პატიმრობა ემუქრება ჯაშუშობის ბრალდებით.

2023 წელს ყაზანის აეროპორტიდან გამოფრენის წინ დააკავეს რადიო თავისუფლების ჟურნალისტი ალსუ კურმაშევა. მას ჩამოართვეს აშშ-ისა და რუსეთის პასპორტები. რამდენიმე დღის შემდეგ მის წინააღმდეგ აღიძრა სისხლის სამართლის საქმე მეორე ქვეყნის მოქალაქეობის შეუტყობინებლობის ბრალდებით. ამავე დროს მის წინააღმდეგ წამოაყენეს ახალი ბრალდება, რომ ის „უცხოეთის აგენტთა“ რეესტრში არ დარეგისტრირებულა.

რუსეთის კოლონიაში პატიმრობას იხდის კიდევ ერთი ამერიკელი, პოლ უილანი. 2020 წლის ზაფხულში მას 16 წლით პატიმრობა მიუსაჯეს ჯაშუშობის ბრალდებით.

ამერიკელი კალათბურთელი ქალი, ბრიტნი გრაინერი, რომელიც 2022 წელს დააკავეს რუსეთში ნარკოტიკის შენახვის ბრალდებით, იმავე წელს გადაცვალეს აშშ-ში პატიმრობაში მყოფ ვიქტორ ბუტზე.