პარიზში, პალესტინის ავტონომიის მხარდასაჭერად გამართულ დემონსტრაციებში მონაწილე სტუდენტებმა 26 აპრილს დაბლოკეს პოლიტიკური კვლევების ინსტიტუტის Sciences Po-ს ყველა შესასვლელი. ისინი მოითხოვენ, რომ უნივერსიტეტმა ოფიციალურად დაგმოს ისრაელის ქმედებები ღაზის სექტორში.
სტუდენტები აცხადებენ, რომ მზად არიან მანამდე გააგრძელონ პროტესტი, სანამ ღაზის სექტორში არ შეწყდება ისრაელის სამხედრო ოპერაცია, რომელსაც დემონსტრანტები “გენოციდს” უწოდებენ.
ინსტიტუტის დირექტორმა ჟან ბასერმა დაგმო უნივერსიტეტის ბლოკადა. მისი თქმით, მოლაპარაკებებს აწარმოებს სტუდენტური აქციის წარმომადგენლებთან, რათა გაათავისუფლონ სასწავლებლის შესასვლელი. წინააღმდეგ შემთხვევაში, მან პირობა დადო, რომ დახმარებისთვის პოლიციას მიმართავს.
24 აპრილს პალესტინის მხარდასაჭერად 60-მდე სტუდენტმა ინსტიტუტის წინ მჯდომარე აქცია მოაწყო. აქცია ინიციირებული იყო" პალესტინის მეცნიერებათა კომიტეტის" მიერ, რომელიც ინსტიტუტში 2023 წლის ნოემბერში შეიქმნა. მალევე მას შემდეგ, რაც ისრაელმა ღაზის სექტორში სამხედრო ოპერაცია წამოიწყო რადიკალური დაჯგუფება ჰამასის (აღიარებულია ტერორისტულ ჯგუფად შეერთებულ შტატებსა და ევროკავშირის ქვეყნებში) წინააღმდეგ.
ამ კვირაში, ღაზაში ომის საწინააღმდეგო მასობრივი საპროტესტო აქციები აშშ-ის რამდენიმე, მათ შორის ყველაზე პრესტიჟულ უნივერსიტეტებში, - გაიმართა.
ებრაელი სტუდენტების აზრით, ისრაელის კრიტიკა ხშირად ანტისემიტიზმში გადადის, რაც მათ საფრთხეს უქმნის. ისინი ასევე შეახსენებენ ყველას, რომ “ჰამასს” ჯერ კიდევ არ გაუთავისუფლებია გასული წლის შემოდგომაზე ისრაელში ტყვედ აყვანილი მძევლები.
საპროტესტო გამოსვლებმა სტუდენტების მრავალი კამპუსი მოიცვა მას შემდეგ, რაც 2023 წლის 7 ოქტომბერს ისრაელს თავს დაესხა აშშ-სა და ევროკავშირში ტერორისტულ ორგანიზაციად აღიარებული პალესტინური დაჯგუფება ჰამასი. მაშინ ტერორისტებმა დახოცეს 1200-ზე მეტი ადამიანი და 250-მდე მძევლად წაიყვანეს ღაზაში. ამის საპასუხოდ ისრაელმა ღაზაში, რომელსაც ჰამასი აკონტროლებს, სამხედრო ოპერაცია დაიწყო ჰამასის განადგურების მიზნით. ღაზის ჯანდაცვის სამინისტროს ცნობით, ისრაელის არმიის იერიშის შედეგად ოქტომბრიდან მოყოლებული ღაზის სექტორში დაიღუპა 34 ათასი პალესტინელი - ძირითადად ქალები და ბავშვები.