გიორგი ბარვენაშვილზე ქართულ მედიაში პირველად 2019 წლის ნოემბერში დაიწერა და მომზადდა სიუჟეტები. „მთავარ არხსა“ და „ფორმულის“ ეთერში მაშინ გავიდა სიუჟეტი ევროპაში ერთ-ერთ მიმზიდველ კომოს ტბაზე გამართული წვეულების შესახებ, რომლის მასპინძელი გიორგი ბარვენაშვილი იყო, სტუმრები კი მაშინდელი პარლამენტის თავმჯდომარე არჩილ თალაკვაძე და მმართველი პარტიის გენერალური მდივანი კახა კალაძე. მედია მაშინ ამ მოგზაურობით დაინტერესდა, რადგან პარლამენტის შენობის წინ აქციები იმართება იმის გამო, რომ მმართველმა პარტიამ არ შეასრულა არჩევნების სრულად პროპორციულად ჩატარების დაპირება.
დავუბრუნდეთ გიორგი ბარვენაშვილს, რომელმაც თანამდებობის პირისთვის სავალდებულო დეკლარაცია პირველად 22 აპრილს შეავსო. ამ დოკუმენტით ირკვევა, რომ დეპუტატს მხოლოდ საკუთარ სახელზე აქვს ქონება რეგისტრირებული, ცოლს კი არაფერი ეკუთვნის.
დეპუტატის სახელზეა რეგისტრირებული ბინა, სახლი და მიწის ნაკვეთები თბილისში, სახლი მცხეთაში ასევე, ორი მსუბუქი ავტომობილი. ზოგიერთ შემთხვევაში ამ უძრავ ქონებას ჰყავს თანამესაკუთრე, რომელთა შესახებაც დეკლარაციაშია ინფორმაცია მითითებული.
გიორგი ბარვენაშვილს ეკუთვნის რვა ძვიდარღირებული საათი, რომელთა ჯამური ღირებულებაც, დეკლარაციის მიხედვით, 439 400 დოლარია.
დეპუტატს ეკუთვნის „ბიტკოინისა“ და „ეთერიუმის“ კრიპტოვალუტები, რომელთა ნომინალური (პირობითი) ფასი 3 350 660 დოლარია.
გიორგი ბარვენაშვილსა და მის ცოლს მაია მაისაძეს ათობით ათასი ევრო და დოლარი აქვთ საბანკო ანგარიშებზე. კიდევ უფრო დიდი თანხა აქვთ ნაღდი ფულის სახით.
დეკლარაციის მიხედვით, დეპუტატის შემოსავლის ერთადაერთი წყარო გასულ წელს ბიზნესი იყო - მან შპს „ოდა“-დან 2 630 559 ლარი მიიღო.
გიორგი ბარვენაშვილმა 2020 წელს 60 ათასი ლარი შეწირა „ქართულ ოცნებას“, 2018 წელს კი ამდენივე თანხა სალომე ზურაბიშვილს, რომელიც მაშინ პრეზიდენტობის კანდიდატი იყო.