რუსეთის თავდაცვის მინისტრის მოადგილე ტიმურ ივანოვი ქრთამის აღების ბრალდებით დააკავეს. ინფორმაცია რუსეთის საგამოძიებო კომიტეტმა გაავრცელა 23 აპრილს. უწყება დამატებით დეტალებს არ ახმაურებს.
რუსეთის თავდაცვის სამინისტროს ვებსაიტზე არსებული ინფორმაციით, ტიმურ ივანოვი 49 წლისაა. 1999-2012 წლებში მუშაობდა საწვავის და ენერგეტიკული კომპლექსის საწარმოებში, შემდეგ მოსკოვის საოლქო მთავრობაში. 2013 წლიდან 2016 წლამდე მუშაობდა „ობორონსტროის“ გენერალურ დირექტორად. 2016 წლის მაისში რუსეთის პრეზიდენტის ბრძანებულებით თავდაცვის მინისტრის მოადგილედ დაინიშნა.
ტიმურ ივანოვი რუსეთის ჯარების საცხოვრებლის საკითხებს, სამინისტროს ობიექტების მშენებლობა-რემონტსა და სამხედრო იპოთეკებს კურირებს. ის ჩართული იყო რუსეთის შეიარაღებული ძალების მთავარი ტაძრის მშენებლობის საქმეში, ამის შესახებ РБК აღნიშნავს.
რუსეთის თავდაცვის მინისტრის მოადგილე სანქცირებული იყო აშშ-ის, ევროკავშირის, დიდი ბრიტანეთისა და კანადის მიერ.
2022 წლის დეკემბერში ოპოზიციონერი პოლიტიკოსის, ალექსეი ნავალნის გუნდმა ტიმურ ივანოვის ოჯახის შესახებ გამოძიება გამოაქვეყნა. მასალაში ნათქვამი იყო, რომ ივანოვმა და მისმა ცოლმა სვეტლანამ მილიონ ევროზე მეტი დახარჯეს შვებულებაში, ვილების და იახტების, სამკაულების და ტანსაცმლის დაქირავებაში. თანამდებობის პირის ცოლის პირადი ხარჯი კი აანაზღაურა კომპანიამ, რომელიც ომით განადგურებული უკრაინის ქალაქის, მარიუპოლის სარეკონსტრუქციო სამუშაოებს აწარმოებს.