სამართალდამცველებმა პოლონეთში დააკავეს რუს ოპოზიციონერ ლეონიდ ვოლკოვზე ლიეტუვაში მომხდარ თავდასხმაში ეჭვმიტანილი ორი პირი.
ამის შესახებ პარასკევს განაცხადა ლიეტუვის პრეზიდენტმა გიტანას ნაუსედამ, რომელმაც პირადად პოლონეთის პრეზიდენტ ანჯეი დუდას გადაუხადა მადლობა პოლონელი სამართალდამცველების "შესანიშნავი მუშაობისთვის". ნაუსედას თქმით, ეჭვმიტანილებს ლიეტუვის ხელისუფლებას საჭირო პროცედურების დასრულების შემდეგ გადასცემენ.
კოლონიაში გარდაცვლილი რუსი ოპოზიციონერი პოლიტიკოსის, ალექსეი ნავალნის თანამოაზრეს, პოლიტიკოსსა და დისიდენტ ლეონიდ ვოლკოვს 12 მარტს ლიეტუვის დედაქალაქში, ვილნიუსში, დაესხნენ თავს.
თავდამსხმელებმა ვოლკოვის სახლთან ჩაამსხვრიეს მისი ავტომობილის ფანჯარა, პოლიტიკოსს თვალებში ცრემლმდენი აირი შეასხეს და შემდეგ ჩაქუჩი ჩაარტყეს.
პოლონეთში დაკავებული ეჭვმიტანილების ვინაობის შესახებ ცნობები არ გავრცელებულა. მანამდე ლიეტუვის სპეცსამსახურებმა და ხელისუფლებამაც განაცხადეს, რომ ალექსეი ნავალნის თანამოაზრე ვოლკოვზე თავდასხმის უკან, სავარაუდოდ, რუსეთის ხელისუფლება იდგა.
„ეჭვგარეშეა, რომ ასეთი რამეები წინასწარ იგეგმება. მაგრამ მინდა განვმარტო: ხელისუფლება მოახდენს შეფასებას, ჩაატარებს გამოძიებას და იმედი მაქვს, იპოვის დამნაშავეებს. და მინდა პუტინს მხოლოდ ერთი რამე ვუთხრა: აქ თქვენი არავის ეშინია“, - განაცხადა 14 მარტს ლიეტუვის პრეზიდენტმა გიტანას ნაუსედამ.