18 აპრილის დილით, პოლონელმა ფერმერებმა კვლავ გადაკეტეს უკრაინის საზღვართან მდებარე კორჩევა-კრაკოვეცისა და მედიკა-შეგინის გამშვები პუნქტები. ამის შესახებ რადიო თავისუფლებას აქციის ერთ-ერთმა ორგანიზატორმა, „მოტყუებულ აგრარიკოსთა“ ლიდერმა რომან კონდრუვმა განუცხადა.
მისივე თქმით, ფერმერები ცდილობენ პრემიერ-მინისტრ დონალდ ტუსკთან შეხვედრას, რათა მისგან მოისმინონ, თუ კონკრეტულად რას აკეთებს მთავრობა ფერმერთა პრობლემების მოსაგვარებლად.
"უკრაინულმა მხარემ განაცხადა, რომ მოსავლის აღების პერიოდში პოლონეთის გავლით 450 ათასი ტონა მარცვლეული უნდა გაიტანონ, ჩვენ კი საკუთარ მარცვლეულს ვერ ვყიდით. პრემიერ-მინისტრი ტუსკი უგულებელყოფს ჩვენს თხოვნას, რომ დაგველაპარაკოს. დაე, მოვიდეს ჩვენთან და გვითხრას: "ძვირფასო ფერმერებო, ფული არ არის, მე ვერ დაგეხმარებით, ბრიუსელი კი უფრო მეტად გვაწვება, რომ კიდევ უფრო მეტი მარცვლეული გავიდეს და კიდევ უფრო მეტად გამდიდრდნენ უკრაინელი ოლიგარქები. თუ ბრიუსელს სურს, გააგრძელოს ამ მარცვლეულის ასეთი მოცულობით იმპორტი ევროპაში, მაშინ ჩვენ უბრალოდ გავკოტრდებით, რადგან ჩვენ ვერ შევძლებთ ჩვენი მარცვლეულის გაყიდვას", - ამბობს რომან კონდრუვი.
პროტესტის ნიშნად პოლონელი ფერმერები საათში ერთი სატვირთო მანქანის გატარებას გეგმავენ, ხოლო სხვა სატრანსპორტო საშუალებას დაუბრკოლებლად გაატარებენ. ჯერჯერობით ამ ორი საგუშაგოს ბლოკირება ორი დღითაა დაგეგმილი. ამის შემდეგ ფერმერები ითათბირებენ, გააგრძელებენ თუ შეწყვეტენ პროტესტს.
პოლონელი ფერმერები თებერვლიდან მოითხოვენ უკრაინიდან სასოფლო-სამეურნეო პროდუქციის იმპორტის აკრძალვას. ისინი ასევე ეწინააღმდეგებიან ევროპის აგრარულ პოლიტიკას, კერძოდ, ილაშქრებენ "მწვანე სისტემის" დანერგვის წინააღმდეგ. საუბარია მთელ რიგ გარემოსდაცვით პრობლემებსა და კლიმატურ მოთხოვნებზე. მოთხოვნებს შორისაა ასევე მეცხოველეობის მხარდაჭერა.
რამდენიმე შემთხვევა იყო, როდესაც პოლონელმა ფერმერებმა უკრაინის მარცვლეულით დატვირთული მანქანები სასაზღვრო პუნქტთან გააჩერეს, მარცვლეული კი მიწაზე გადმოყარეს.