საქართველოს პრეზიდენტი სალომე ზურაბიშვილი მთავრობის ადმინისტრაციასთან მიმდინარე საპროტესტო აქციას ეხმაურება და შეკრებილებს მიმართავს, რომ "პროვოკაციის და დაძაბვის დრო არაა!"
"ხალხმა სიმშვიდისა და შემართების მაგალითი ყველას მოგვცა! დღეს არ თავდება ეს პროტესტი", - წერს სალომე ზურაბიშვილი ფეისბუქის გვერდზე.
მანამდე დაპირისპირება იყო მთავრობის ადმინისტრაციის შენობასთან მიმდინარე აქციაზე, სადაც პოლიციამ ოპოზიციონერი დეპუტატი ალეკო ელისაშვილი ავტომანქანით გაიყვანა. ვიდეოკადრები, რომლებშიც ჩანს, როგორ სვამენ ძალის გამოყენებით პოლიტიკოსს მანქანაში, „მთავარმა არხმა“ გაავრცელა.
მანამდე რამდენიმე წუთით ადრე, ალეკო ელისაშვილი პრემიერ-მინისტრ ირაკლი კობახიძესთან შეხვედრას ითხოვდა და პოლიციასთან დაპირისპირება მოუხდა.
"აგენტების კანონის" გასაპროტესტებლად პარლამენტთან შეკრებილი დემონსტრანტები მსვლელობით გადავიდნენ მთავრობის ადმინისტრაციასთან. ისინი პრემიერ-მინისტრ ირაკლი კობახიძესთან შეხვედრას ითხოვდნენ.
მანამდე პარლამენტის შენობის წინ შეკრებილმა მოქალაქეებმა "აგენტების კანონის" გასაწვევად „ქართულ ოცნებას“ ვადა 22:30 საათამდე მისცეს.
პარლამენტის შენობასთან "აგენტების კანონის" გასაპროტესტებლად მოქალაქეები უკვე მესამე დღეა იკრიბებიან.
დღეს, 17 აპრილს, პარლამენტმა პირველი მოსმენით მიიღო ე.წ. აგენტების კანონი.
საქართველოს პარტნიორი ქვეყნებისა და ორგანიზაციების შეფასებით, ე.წ. აგენტების კანონი ხელს შეუშლის ქვეყნის ევროინტეგრაციას, მმართველი პარტია კი ამტკიცებს, რომ ის ევროპულია.
2023 წლის მარტში ხალხმრავალი აქციებისა და საერთაშორისო კრიტიკის გამო საპარლამენტო უმრავლესობა იძულებული გახდა, „უცხოეთის აგენტების კანონი“ ჩაეგდო და პირობა დადო, რომ პროექტს აღარ დაუბრუნდებოდა.
„ქართულმა ოცნებამ“ კანონპროექტი 2024 წლის 3 აპრილს დააბრუნა პარლამენტში. ტერმინი „უცხოური გავლენის აგენტი“ პროექტში მან "უცხო ძალის ინტერესების გამტარებელი ორგანიზაციით" ჩაანაცვლა.