სამოქალაქო და მედიაორგანიზაციების წარმომადგენლები ქუთაისში მთავარ მოედანზე შეიკრიბნენ პლაკატებით, რომლებზეც ეწერა: „არა რუსულ კანონს!“ ასე გააპროტესტეს მათ ე.წ. აგენტების კანონი, რომელსაც მმართველი პარტია „გამჭვირვალობის კანონს“ უწოდებს.
„ეს არის რეალურად ხელისუფლების პრობლემა, მათ არ უნდათ კრიტიკული აზრის მოსმენა“, - ამბობს თეა ზიბზიბაძე, „ქუთაისიპოსტის“ ხელმძღვანელი.
მისი თქმით, ორგანიზაცია ათწლიანი არსებობის განმავლობაში უცხოური ფონდებიდან ფინანსდება. თეა ზიბზიბაძის თანახმად, მათი დახმარება რომ არა, ვერ შეძლებდნენ მოსახლეობის ინფორმირებას და რეგიონში არსებული პრობლემების გაშუქებას.
„ეს კანონი რუსულია და არაფერი აქვს საერთო ევროპულთან“, - ამბობს აქციის კიდევ ერთი მონაწილე, ახალგაზრდობის საკითხებზე მომუშავე სამოქალაქო ორგანიზაციის, „თაობათა დიალოგის“ დამფუძნებელი ნუგზარ კოხრეიძე.
„ქართულმა ოცნებამ“ ე.წ. აგენტების კანონი 3 აპრილს ხელახლა დაარეგისტრირა. ამ კანონის მიღების მცდელობამ 2023 წლის მარტში მასობრივი საპროტესტო აქციები გამოიწვია. საბოლოოდ მმართველმა პარტიამ კანონპროექტი გაიწვია.
პარლამენტის ვებსაიტზე გამოქვეყნებული ინფორმაციით, ამჯერად კანონპროექტის განხილვა 15 აპრილს იგეგმება იურიდიულ საკითხთა კომიტეტის სხდომაზე. ადგილობრივი არასამთავრობო ორგანიზაციებისა და საერთაშორისო პარტნიორების მკვეთრად უარყოფითი პოზიციის მიუხედავად, „ქართული ოცნების“ საპარლამენტო უმრავლესობა კანონის მიღებას აპირებს.