კვირის განმავლობაში, რუსეთის სამართალდამცავი სტრუქტურები მიგრანტების აღმოსაჩენად მასობრივ რეიდებს აწყობდნენ როგორც სანქტ-პეტერბურგში, ასევე ქვეყნის სხვა ქალაქებში.
როგორც იტყობინებიან, ბოლო 5 დღის განმავლობაში, ქალაქის სასამართლოებში თითქმის 600 პირის საქმე შევიდა. 418 პირთან დაკავშირებით, ჯარიმის დაწესებასთან ერთად, მიღებულია დეპორტაციის გადაწყვეტილებაც. კიდევ 50 უცხოელს ქვეყნის დამოუკიდებლად დატოვება დაევალა.
"Фонтанка-ს" ინფორმაციით, დეპორტაციის წინ 418 პირი უცხო ქვეყნების მოქალაქეების დროებითი განთავსების ცენტრში გადაიყვანეს. მანამდე გავრცელებული ოფიციალური სტატისტიკის თანახმად, ხსენებული ცენტრი მხოლოდ 336 ადამიანს იტევს.
ერთ-ერთი ადვოკატის თქმით, დეპორტაციის პროცესი რუსეთში უკვე დაწყებულია და უცხო ქვეყნის მოქალაქეებს მასობრივად თვითმფრინავებით ასახლებენ ქვეყნიდან.
"Важные истории" იტყობინებოდა, რომ მოსკოვში, ბოლო კვირის განმავლობაში, სასამართლოში თითქმის 1500 მიგრანტის საქმე შევიდა. მათაც კანონმდებლობის დარღვევას ედავებიან.
22 მარტს საკონცერტო დარბაზ „კროკუს სიტი ჰოლში,“ რომელიც მოსკოვის მახლობლად მდებარეობს, თავდასხმა განახორციელა რამდენიმე შეიარაღებულმა პირმა, რა დროსაც 144 ადამიანი მოკლეს.
რუსეთის საინფორმაციო სააგენტო ტასს-ი მოსკოვის ოლქის საგანგებო ვითარებათა სამსახურის მონაცემებზე დაყრდნობით იტყობინება, რომ ტერაქტის დროს 551 ადამიანი დაშავდა. AP-ის თანახმად, ადრე გამოცხადებული რიცხვი მნიშვნელოვნად დაბალი იყო და ეს განსხვავება ჯერ აუხსნელია.
თავდასხმაზე პასუხისმგებლობა აიღო მსოფლიოში ტერორისტულ ორგანიზაციად გამოცხადებული „ისლამური სახელმწიფოს“ ერთ-ერთმა განშტოებამ ("ხორასანი"). რუსეთის უშიშროების ფედერალური სამსახურის თანახმად, დაკავებულია 11 პირი, მათ შორის თავდასხმის 4 უშუალო მონაწილე, რომლებიც ტაჯიკეთის მოქალაქეები არიან.
რამდენიმე პირი დააკავეს ასევე ტაჯიკეთში. 24, 25 და 26 მარტს, სასამართლომ წინასწარი პატიმრობა მიუსაჯა 8 ბრალდებულს. ოთხს ტერაქტში უშუალო მონაწილეობაში ადანაშაულებენ, დანარჩენებს კი - მათ დახმარებაში.